Кыргыз Республикасынын Эмгек, социалдык камсыздоо жана миграция министрлигине караштуу Жарандарды чет өлкөдө ишке орноштуруу борбору
жарандарды Россия Федерациясына кирүү, болуу жана эмгек ишмердигин жүргүзүү тартибине байланышкан маанилүү маалыматтар менен маалымдайт.

🧳 1. Сапарга даярдык

Россия Федерациясына чыгаардан мурда төмөнкү маалыматтар менен алдын ала таанышуу сунушталат:
— чек арадан өтүү эрежелери;
— миграциялык картаны туура толтуруу;
— каттоого туруу;
— турак-жай издөө;
— жумуш табуу жана эмгек укуктарын коргоо жолдору.
Бул маалыматтар мыйзам бузуу жана башка көйгөйлөрдүн алдын алууга жардам берет.

🔍 2. Кирүүгө тыюу салынгандыгын текшерүү

Сапарга чыкканга чейин, жок дегенде 2 ай мурун, Россия Федерациясына кирүүгө чектөөнүн бар же жок экендигин текшерүү зарыл. Маалыматты Россиянын ИИМ расмий сайтынан алса болот:
👉 http://services.fms.gov.ru/info-service.htm?sid=3000

🛂 3. Чек арадан өтүү

Кыргыз Республикасынын жарандары Россияга чет өлкөлүк паспорт же ID-карта менен кире алышат.
Миграциялык картаны толтурганда, эгер иштөөнү пландап жатсаңыз, сөзсүз «жумуш» деген максатты белгилеңиз. 

Кирүү максатын кийин өзгөртүүгө мүмкүн эмес!

🩺 4. Медициналык текшерүү, манжа изин алуу жана сүрөткө тартуу

2021-жылдын 29-декабрынан тартып Россияга иштөө максатында келген бардык чет өлкөлүк жарандар, анын ичинде кыргызстандыктар да, кирген күнүнөн тартып 30 күндүн ичинде төмөнкүлөрдөн өтүүгө милдеттүү:
✅ медициналык кароо;
✅ манжа изин каттоо (дактилоскопия);
✅ сүрөткө түшүү.
Эгер бул талаптар аткарылбаса, болуу мөөнөтү кыскартылышы мүмкүн.

🏠 5. Миграциялык каттоо

Кыргызстандын жарандары Россияга киргенден кийин 30 күндүн ичинде каттоого туруу милдетинен бошотулат.

Бирок, эгерде Россияда 30 күндөн ашык болуу пландалса —
миграция боюнча бөлүмгө барып каттоого туруу зарыл.
Эгер иш максатында келген болсоңуз — каттоо мөөнөтү эмгек келишиминин мөөнөтүнө жараша узартылат.

💼 6. Иштөө тартиби

Кыргыз Республикасынын жарандары Россияда патентсиз жана орус тилин билүү боюнча экзаменсиз иштөөгө укуктуу.
Эмгек ишмердигин эмгек келишиминин негизинде жүргүзүү керек.

⚠️ Россияда болуу мөөнөтү автоматтык түрдө узартылбайт!
Мөөнөттү узартуу үчүн:
✅ мамлекеттик төлөмдү төлөө;
✅ миграция бөлүмүнө жеке кайрылуу;
✅ миграциялык картанын артына мөөнөттү узартуу мөөрүн койдуруу керек.

🎯 Бул талаптар аткарылбаса, мөөнөт өтүп кеткендиги үчүн айып пул же өлкөдөн чыгаруу коркунучу бар.

🏥 7. Медициналык жардам укугу

ЕАЭБ өлкөлөрүнөн келген жарандар, анын ичинде кыргызстандыктар да, Россияда ММК (милдеттүү медициналык камсыздандыруу) полисин алышат.
Анын негизинде төмөнкү жардамдар көрсөтүлөт:
— шашылыш жана амбулатордук жардам;
— оор абалдарда стационардык жардам;
— төрөт жана кош бойлуулук боюнча жардам;
— пландуу дарылоо жана реабилитация.

⚖️ 8. Укуктук коргоо

Кыргызстандын жарандары Россиянын мыйзамдык органдарына — сотко, прокуратурага, ички иштер органдарына жана башка мамлекеттик мекемелерге РФнын жарандары менен тең шартта кайрыла алышат.

📅 9. 2025-жылдын 1-январынан тартып жаңы өзгөрүүлөр

Россия Федерациясынын 2024-жылдын 8-августундагы №260-ФЗ мыйзамына ылайык,
2025-жылдын 1-январынан тартып виза талап кылынбаган өлкөлөрдүн жарандарынын
Россияда болуу мөөнөтү жылына 90 күн менен чектелет.
Айрым өзгөчөлүктөр эл аралык келишимдерге жараша колдонулат.

📌 Жарандарды чет өлкөдө ишке орноштуруу борбору Кыргызстандын жарандарын
Россияга чыгуудан мурда маалыматтарды кылдат текшерүүгө,
мыйзамдарды сактоого жана документтерин алдын ала даярдоого чакырат.

🕐 Документтериңизди тыкан сактаңыз жана алардын жарактуулук мөөнөтүн алдын ала текшериңиз!

📞 Пайдалуу байланыштар

📍 Кыргыз Республикасынын Эмгек, социалдык камсыздоо жана миграция министрлигине караштуу Жарандарды чет өлкөдө ишке орноштуруу борбор: 

🌐 Сайт: www.migrant.kg
📞 Тел.: 0 (312) 64-17-64
📱 WhatsApp: +996 (559) 189-900
🏢 Дарек: Бишкек ш., Токтогул көч., 237; Ош ш., К. Датка көч., 128

📍 Кыргыз Республикасынын Эмгек, социалдык камсыздоо жана миграция министрлигинин Россиядагы өкүлчүлүгү
🏢 Москва ш., Малая Полянка көч., 7-үй, 5-бөлмө
📞 Тел.: +7 (495) 197 76 71
📱 Ыкчам байланыш: +7 (925) 030 26 27
📧 E-mail: pred.mtsom@mail.ru

📍 Кыргыз Республикасынын Россиядагы Элчилиги
🏢 Москва ш., Большая Ордынка көч., 64
📞 Тел.: +7 (499) 237 65 65
📱 Консулдук байланыш: +7 (925) 115 50 47, +7 (925) 285 50 47
📧 E-mail: kgembassy.ru@mfa.gov.kg