18-декабрда белгиленүүчү Эл аралык мигрант күнүнө карата, Кыргыз Республикасынын Эмгек, социалдык камсыздоо жана миграция министрлигине караштуу Жарандарды чет өлкөдө ишке орноштуруу борбору (мындан ары – Борбор) жаңы жылдык номинацияны – «Багытталган өлкөлөр боюнча жылдын мыкты жеке иш менен камсыздоо агенттиги» сыйлыгын ишке киргизүүдө.

Демилге эмгек миграция тармагында ачык-айкындуулукту өнүктүрүүгө, кызмат көрсөтүүлөрдүн сапатын жогорулатууга жана Кыргыз Республикасынын жарандары үчүн жогорку кесипкөйлүктү жана жоопкерчиликти көрсөтүп келе жаткан агенттиктерди колдоого багытталган.

Жеке иш менен камсыздоо агенттиктеринин иши КР жарандарынын коопсуз жана натыйжалуу миграциясына реалдуу салым кошкон негизги көрсөткүчтөрдүн жыйындысы боюнча бааланат. 

Критерийлер төмөнкүлөрдү камтыйт:

            
• отчеттук мезгилде жумушка орноштурулган жарандардын саны;

• жарандардан, чет элдик иш берүүчүлөрдөн жана мамлекеттик органдардан даттануулардын жоктугу;

• Кыргыз Республикасынын жана жумушка орноштуруучу өлкөлөрдүн мыйзамдарын сактоо;

• документтерди даярдоодон тартып окуу, адаптацияга чейин бардык этаптарда жарандарды сапаттуу коштоп жүрүү;

• эмгек рыногундагы профессионалдык бедел;

• сертификаттардын жана тастыкталган тажрыйбанын болушу;

• тренингдерге, семинарларга жана окуу программаларына активдүү катышуу.

Мыктыларды сыйлоо 
Жеңүүчүлөргө өлкө багыты көрсөтүлгөн «Багыт боюнча мыкты ЖИА» эстелик белгиси жана Борбордун ыраазычылык каттары тапшырылат.

Мындан тышкары, мигранттарды колдоодо инновациялык ыкмаларды колдонгон, кардарлардын жогорку канааттануусун камсыздаган, эл аралык эмгек миграция стандарттарын сактаган жана жыл бою туруктуу сапаттуу көрсөткүчтөрдү көрсөтүп келген жеке агенттиктерге дагы ыраазычылык каттары берилет. 

Жыл сайын өткөрүлүүчү салт     
Сыйлык тапшыруу аземи жыл сайын өткөрүлүүчү иш-чара болуп, Эл аралык мигрант күнүнө арналат.

Борбор бул сыйлыктын киргизилиши жарандардын жеке иш менен камсыздоо агенттиктерине болгон ишенимин жогорулатууга жана кызмат көрсөтүүлөрдүн сапатын арттырууга маанилүү салым кошот деп ишенет.